नवरात्रीचे दिवस सुरु झाले आहेत. रोज निरनिराळ्या रंगाच्या कपड्यामध्ये वावरणाऱ्या ललना आजकाल, ठरवून एकाच रंगाचे कपडे परिधान करून ऑफिसला कार्यक्रमाना जाऊ लागल्या आहेत. या सगळ्या नवरात्रीच्या भारलेल्या वातावरणात एक वेगळीच एकात्मता दिसू लागली आहे. नवदुर्गा जणू रोज नवनवीन रंगात वावरताना दिसता आहेत. आज पिवळ्या रंगाच्या साड्या, ड्रेस घालून वावरणाऱ्या सगळ्यांना पाहून एक गोष्ट लक्षात आली पिवळा रंग म्हटला तरी प्रत्येकाच्या वस्त्राची रंग छटा वेगळीच होती कि. रंग तोच पण त्यातल्या रंग घटकांचे प्रमाण थोडे कमी जास्त झाले कि लगेच छटा बदलेली.. काहींचे ड्रेस, साड्या वेगवेगळया नक्षी कामाने तर काहींची वस्त्रे वेगळ्या रंगाचा वापर त्या पिवळ्या पाश्वभूमी वर करून सुशोभित केलेली.
खरे तर पिवळा रंग म्हटला तर, एक विशिष्ट रंग छटा मनचक्षु समोर उभी राहते... पण प्रत्येक्षात प्रत्येक ठिकाणी वेगळी रंग छटा समोर येते.. मग खरा रंग कोणता? रंगातल्या घटकांचे प्रमाण कणभरही कमी जास्त झाले तरी बदलणारा रंग अगदी मूळ रंगातले पाण्याचे प्रमाणही कमी जास्त झाले तरी आपली छटा बदलतो. तसाच इतर रंगाचे बेमालूम मिश्रणही रंगाची छटा बदलते. या रंगाच्या गुणधर्म सारखेच माणसांचे आहे ना...
दोन हात, दोन पाय, दोन डोळे.....एक मेंदू, एक हृदय आणि नसानसातून वाहणारे रक्तही एकाच रंगाचे.... असे असूनही प्रत्येक माणसाच्या स्वभाव आणि व्यक्तीमत्वाची छटा वेगळीच दिसते.
सख्खे भाऊ-बहिणी, जिवलग मित्र एवढंच काय जुळे म्हणून जन्माला आलेली मुलेही वेगवेगळया स्वभावाची आणि व्यक्तीमत्वाची असतात. असे का?
याचे उत्तर या रंगाच्या बाबतीत आहे तसेच फरक एवढंच, त्यात रंग घटक आहेत तर माणसांच्या बाबतीत त्यांना घडवणारे शिक्षण, घरातले संस्कार, सामाजिक संस्कार, कामक्रोध मद मत्सर आणि माया या षड्रीपुंचा त्याच्या मनावर पडणारा प्रभाव असावा. हा प्रभाव त्यांच्या स्वभावाला आणि व्यक्तिमत्वाला वेगवेगळया छटा देत असावा.
आपण आपल्या आयुष्यात या रंगाचा उपयोग करताना अनेकदा विरोधाभासी रंग संगतीला प्राधान्य देतो. आपल्याला विरोधाभासी रंगसंगती भावते. आपण ती मनापासून स्वीकारतो. मग माणसाच्या मनावर प्रभाव टाकणाऱ्या या घटकांचा विचार करून, त्याच्या बदलणाऱ्या स्वभाव छटा मग त्या विरोधाभासी असल्या तरी त्या स्वीकारण्यास का मागे पुढे पाहतो. आपल्या स्वतःच्या व्याक्तीमत्वातही अशाच स्वभावातील बदलत्या छटा दिसत असतात ना?
प्रत्येकाच्या आयुष्यात हा रंग बदलाचा खेळ सुरूच असतो.. जसे प्रमाण कमी जास्त होते त्यात बदल होतो, राग आला तर क्षणापूर्वी रक्तवर्णी असलेला माणूस... आनंदी झाला तर त्यांच्या चेहऱ्याची रंग छटाही बदलते.. म्हणून परिस्थितीनुरूप बदलणाऱ्या या रंग छटा आपल्या मनाप्रमाणे कधी असतील कधी नसतीलही... आज आवडणारी छटा उद्या आवडेलही... निश्चित सांगता येत नाही कारण... आपल्या स्वभाव छटा अशाच बदलत राहणार आहेत.. म्हणून विरोधाभास असला तरी तो आपण स्वीकारला पाहिजे.. त्यातच आपले व्यक्तिमत्व अधिक उठून दिसते...
No comments:
Post a Comment